جو اٹھ گیا ہے زمانے ترا یقیں ہم سے ... nayab shairy

                                        

                             

جو اٹھ گیا ہے زمانے ترا یقیں ہم سے

کوئی تو کام ہؤا ہے غلط کہیں ہم سے

 

اب آئینوں میں بھی ویرانیوں کے ڈیرے ہیں

کہ وقت چھین چکا ہے سبھی حسیں ہم سے

 

ہے گر قصور ہمارا اجاڑا ہے تجھ کو

تو بدلہ کم نہ لیا تو نے بھی زمیں ہم سے

 

برائے نام محبت کا نام لیتے ہیں

وگرنہ اس کا کوئی واسطہ نہیں ہم سے

 

ترے سوا جو ہمارا اگر ٹھکانہ نہیں

مکان تو بھی کہاں پائے گا مکیں ہم سے

 

حسد نہ کیجئے ان اڑتے ہوئے پرندوں سے

کہ ایک خوف نے چھینی ہے یہ زمیں ہم سے

 

مٹانے والے مٹا کر ہمیں ہیں شرمندہ

کہانی بن گئے کردار دل نشیں ہم سے

 

۔۔۔۔۔ اتباف ابرک